Benetako kasuetatik ikastea da Enologia Berritzaileko Masterraren ezaugarri nagusietako bat. Oraingo honetan, ikasgela hausnarketarako eta sormenerako gune bihurtu zen oso proposamen berezi bati esker: Bodegas Hesvera upategiaren komunikazio-estrategia aztertzea.
Ekimenaren bultzatzailea Emilio izan zen, Masterreko ikasleetako bat eta familia-upategi horren parte dena. Bere proiektua ikaskideekin partekatu nahi izan zuen, haien ikuspegiak, ideiak eta iradokizunak jasotzeko, eta horrela upategiaren komunikazioa aberasteko.
Benetako kasu horretatik abiatuta, ikasleek elkarlanean aztertu zituzten upategiaren nortasuna, merkatuan duen kokapena eta komunikazio-aukerak. Saioak ideia-truke aberasgarria ekarri zuen, eta agerian utzi zuen zein balio handia duen profil, esperientzia eta ezagutza desberdinetako pertsonak programa berean elkartzeak.

Ikasteko modu honek argi erakusten du zerk egiten duen Enologia Berritzaileko Masterra berezi. Ezagutza zientifiko eta teknikoak eskaintzeaz gain, ikasleek kudeaketan, marketinean eta komunikazioan funtsezkoak diren gaitasunak garatzen dituzte, benetako proiektuetan aplikatuz.
Masterra Nafarroako Unibertsitate Publikoak (UPNA), Euskal Herriko Unibertsitateak (EHU) eta Université de Bordeaux unibertsitateak eskaintzen dute elkarlanean. Prestakuntza praktikoa eta nazioartekoa eskaintzen du, eta sektoreko profesionalen arteko esperientzien trukea sustatzen du.

Masterretik eskerrak eman nahi dizkiogu Emiliori, Bodegas Hesvera ikasgelara ekartzeko izan duen prestutasunagatik, eta zoriondu ikaskide guztiak erakutsitako inplikazioagatik, sormenagatik eta egindako ekarpenen kalitateagatik. Izan ere, ikastea partekatzea ere bada.